Венус Вилијамс на 43 години доби вајлд-карта за настап на Вимблдон
Иако е рангирна на 697. место на ВТА листата Американката ќе игра во сингл на најценетиот турнир во тенисот, затоа што во последно време покажа добра форма а и поради „минатиот труд“
Венус Вилијамс треба да го има својот 24. настап во сингл на Вимблдон, откако 43-годишната Американка доби вајлд-карта за настап.
Вилијамс е петкратна шампионка на Вимблдон во сингл, а беше финалистка во 2017 година, две децении по нејзиното деби во „Ол Ингланд“ клубот.
Рангирана на 697. место, Вилијамс ја победи 48. рангираната Камила Џорџи со 7-6 (5), 4-6, 7-6 (6) во Бирмингем. Тоа беше нејзина прва победа над тенисерка од топ 50 во речиси четири години.
Помладата сестра на Вилијамс, Серена, е седумкратна шампионка на Вимблдон. Серена Вилијамс загуби во првото коло на минатогодишниот турнир и набрзо потоа ја објави својата одлука да прекине со тенисот.
Украинската учесничка Елина Свитолина и британските тенисерки Хедер Вотсон и Кејти Бултер исто така добија вајлд-карти.
Дејвид Гофан, Белгиецот кој стигна до четвртфиналето на Вимблдон во 2019 и 2022 година, е меѓу тенисерите на кои им беа дадени вајлд-карти за турнирот што стартува на 3 јули.
