Важеле за лезбијки и проститутки: Независната жена и нејзиниот велосипед во 19 век

Жени со велосипеди во 19 век
Жени со велосипеди во 19 век / Фото: Profimedia

Велосипедите биле многу популарни во доцната викторијанска ера, бидејќи имале нов дизајн, биле посигурни, поудобни и подостапни. Сѐ повеќе мажи и жени ги користеле велосипедите како превозно средство, а т.н. нова жена и нејзиниот велосипед станале феномен на 19 век, пишува „Amazing Women in History“.

Тоа што е особено интересно за деведесеттите години на 19 век е силниот ефект што велосипедот го имал врз ослободувањето на жените. Велосипедизмот им дал нова слобода за жените кои дотогаш биле главно ограничени на движење во домот.

„Новата“ жена била силна и независна. Таа возела велосипед, носела посебни костими како блумери и станала симбол на родовата рамноправност и на редефинираната женственост.

Фото: Profimedia

Различните модели на велосипеди биле измислени во текот на 19 век, но повеќето од нив биле опасни за возење и се сметале повеќе за новитет, отколку за превозно средство. Главно ги возеле само богати млади момчиња и се сметало дека велосипедите со високи гуми од раниот 19 век се неприкладни за дамите.

Осумдесеттите години на 19 век го донеле посигурниот велосипед со ланци какви што имаат и модерните велосипеди и овозможил седиштето да биде пониско за полесно застанување. Во оваа и во следната деценија масовно се произведувале велосипеди, а тоа придонело за пониска цена. Во тој период, луѓето можеле да си купат квалитетен велосипед за помалку од 100 долари.

Новиот сигурносен велосипед им донел невидена независност и слобода на жените. Жените, кои практично биле затворени во своите домови, сега можеле да се движат каде сакаат и кога сакаат, а да не мораат да зависат од мажите.

Фото: Profimedia

Жените како суфражетката Амелија Блумер се обидувале да промовираат реформа на облекувањето, но не можеле да ѝ се спротивстават на модата. Но, кога велосипедите станале толку популарни жените се свртиле кон попрактични фустани. Корсетите и тешките, слоевити здолништа кои биле неопходна мода во тоа време биле невозможни за возење на велосипед. Жените конечно почнале да носат блумери, кратки фустани и поопуштени корсети.

„Новата“ жена и нејзиниот велосипед во осудесеттите и деведесеттите години на 19 век станале вообичаена тема на карикатуристите. Критичарите сметале дека тие ја растураат заедницата и своето домаќинство, напуштајќи ги сопрузите и децата. Постојано се сугерирало дека жените кои носеле блумери и возеле велосипед се само сексуални работнички или лезбијки.

Лекарите дури и ги предупредувале жените дека велосипедот е штетен за нивното здравје, дека се премногу нежни и чувствителни за напорот потребен за возење велосипед и дека честото возење велосипед може да ги оштети внатрешните органи и да доведе до неплодност или смрт. Припадниците на свештенството проповедале против жените кои возеле велосипед, а често жените на велосипед биле опишувани како „одвратни“. Сепак, популарноста на велосипедот продолжила да расте сè до почетокот на 20 век кога се појавиле автомобилите.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот