Западен Балкан е еден од приоритетите на Европската комисија (ЕК), порача денеска од Сараево комесарот за проширување и соседска политика на ЕУ, Оливер Вархељ.

По разговорите со домаќините, Вархељ пред новинарите изјави дека Комисијата многу ревносно работи од првиот ден за да даде до знаење дека Западен Балкан е приоритет на ЕК.

– И не само тоа. Ние го гледаме Западен Балкан како дел од Европа и го гледаме на долг рок или на краток рок како целосно интегриран во Европската унија, рече тој.

Зборувајќи за иницијативата „мини Шенген”, Вархељ рече дека тоа значи брза можност за проток на стоки и луѓе и оти тоа ќе овозможи прилив на инвестиции и ќе го олесни платниот промет.

– Затоа започнавме да работиме на нова методологија за проширување, почнаа преговори со Северна Македонија и Албанија, итн. Работиме и на забрзано намалување на нееднаквоста меѓу земјите од Западен Балкан и Европската унија, рече еврокомесарот.