Екипата на Вардар денеска потврди две нови засилувања во своите редови и тоа, Николас Боно од Аргентина и Јапонецот, Харуки Кавада кои потпишаа договори со „црвено-црните“.

Вардар во новата сезона ќе игра под водство на Иван Чупиќ и со него на клупата ќе се обиде да ја врати титулата во првенсвото.

„Пред почетокот на новата сезона РК Вардар го зголеми својот играчки ростер со уште две интернационални имиња. Во следните две сезони нови членови на „црвено-црните“ ќе бидат два средни бека, Јапонецот Харуки Кавада и Аргентинецот Николас Боно. Тие ќе се појават на подготовките на екипата на крајот од месецов“, објави Вардар.

Кавада е еден од најголемите јапонски таленти и има 19 години, а беше дел од последното Светско првенство, каде што Јапонија го освои 16. место. Исто така на минатогодишното Азиско првенство го доби признанието за МВП.

Аргентинецот Боно пристигнува од франуцски Истр и во кариерата беше дел од шпанските екипи на Замора и Синфин. Во репрезентативната кариера има настапи на првенствата на Средна и Јужна Америка во 2024 година, Олимписките игри и Светското првенство во 2025.