Вардар утре ќе го одигра реваншот против фински Купс во првото квалификациско коло од Лигата на шампионите, а пред македонскиот шампион е тешка задача да ја надополни негативата од 2:0 по поразот во Скопје.

Во пресрет на натпреварот, тренерот Гоце Фабијани порача дека најважно е неговиот тим да покаже поинаков менталитет во однос на првата средба.

„Важно ми е на овој натпревар да го смениме менталитетот. На првиот меч до голот игравме добро, но примивме гол во најлош можен момент пред крајот на полувремето. Најголема предност на КуПС е што се во натпреварувачки ритам, имаат повеќе мечеви од нас и тоа го гледам само како плус за нив. Ние нема очајнички да влеземе во овој натпревар и безглаво да бркаме резултат. Сакам да видам еден организиран Вардар на теренот кој ќе се бори за секоја топка и педа на теренот. Сакам ред и дисциплина, сѐ да биде плански и постепено“, изјави Фабијани.

Но, ќе има Вардар проблеми и со ростерот бидејќи повредени се двајца фудбалери.

Ќе ги немаме во тимот Торес и Босанчиќ, но на тоа не смееме да гледаме како хендикеп, туку целиот тим очекувам да се бори да ги надополни нив. Сите играчи кои се во ростерот мора да сфатат дека нема прва и втора екипа, туку секој што ќе добие шанса, да даде максимум затоа што го носи дресот на Вардар.

Реваншот меѓу Купс и Вардар ќе се игра утре со почеток од 17 часот, а директен телевизиски пренос ќе има на „Арена Спорт Македонија“.