Играчите на Вардар 1961 стигнаа вечерва и до втората победа на натпреварите од СЕХА Газпром лигата. Во СЦ „Јане Сандански“ – Скопје, „црвено-црните“ беа подобри од екипата на Нексе (Хрватска) со резултат 27:26 (15:12).

Македонскиот претставник одлично го стартуваше дуелот со 4:0, после двата гола на Талески и по еден на Дибиров и Јотиќ, додека седмерец одбрани Ристовски. Ривалот тешко доаѓаше до ситуација да реализира, едноставно нашата екипа играше одлично во одбраната, а дури во осмата минута противникот го постигна својот прв гол и тоа со удар од седум метри.

Вардар ја одржуваше позитивата од четири гола до 17 минута кога беше 11:7, потоа следуваше лош период на играчите на Стевче Алушовски од шест минути без погодок. Тоа беше казнето од противниците кои направија серија од 0:3 и намалија на само 11:10.

Не се дозволи израмнување, Дибиров и Георгиевски вратија на „плус три“, а минутажа доби и новото засилување Шеваљевиќ. Потсетување, на овој дуел играше Вардар играше без Дисингер кој се пожали на повреда од дуелот со Војводина, како и без голманот Кантегрел и Мишевски, додека шанса доби младиот Кизиќ.

Во првите осум минути од вториот дел гледавме игра гол за гол, Вардар и понатаму одржуваше предност која се движеше од три-четири голови разлика. Македонскиот репрезентативец, Филип Талески, ја имаше досега една од најдобрите партии во „црвено-црниот“ дрес, со неговиот шести гол Вардар дојде до водство од 23:20, но со два брзи погодоци, Нексе намали на 23:22, што беше знак за Алушовски да побара тајмаут во 46 минута. Натпреварот влезе во резултатска неизвесност, откако Нексе во 50 минута го израмни резултатот на 24:24. Противникот имаше можност и за прва предност, но Дибиров погоди во контра напад за резултат 26:25 во 57 минута. До самиот крај Хрватите не се предаваа, како еден од клучните моменти се одвојува двојната интервенција на Борко кој го запре Кевиќ и придонесе во освојувањето на бодовите.

Најефикасни со по шест голови имаа Талески и Чупиќ, Ристовски собра седум одбрани, а на спротивната страна Кевиќ седумпати се запиша во листата на стрелците, голманот Радовановиќ забележа 10 одбрани.

На табелата во групата „Б“ со максимални шест бодови води Вардар 1961, пред Нексе (три), а без бодови се Војводина и Мотор Запорожје.