Љубителите на боксот можат да очекуваат вистински спектакл на „Вембли“, каде што денеска околу 22.00 часот ќе се соочат украинскиот шампион Олександр Усик и силниот Британец Даниел Дубоа во меч за обединување на сите титули во тешка категорија.

Усик и Дубоа ќе се борат за титулата апсолутен шампион во тешка категорија, а мечот е најавен како еден од најважните во поновата историја на професионалниот бокс.

Усик моментно ги држи титулите во WBA, WBO и WBC, а влегува во рингот како непоразен борец и олимписки шампион, додека Дубоа го држи појасот на IBF и сака да влезе во историјата како прв Британец кој ги обединил сите главни појаси по Ленокс Луис.

Атмосферата во Лондон е на врвот, билетите за овој спектакл се распродадени, се очекуваат речиси 90.000 гледачи на стадионот и милиони пред малите екрани низ целиот свет.

Овој дуел има и подлабока симболика – Усик ја посвети борбата на украинскиот народ, додека помладиот Дубоа верува дека ќе освои слава пред домашната публика.

Долгоочекуваниот реванш носи огромно спортско и симболично значење – победникот ќе ги освои сите титули и ќе стане апсолутен светски шампион во тешка категорија. За Усик, ова е можност да ја потврди својата доминација, а за Дубоа, шанса конечно да го докаже својот квалитет.

Борбата е една од нај финансиски профитабилните во историјата на тешка категорија. Вкупниот награден фонд е околу 152 милиони фунти (приближно 200 милиони долари). Усик ќе заработи околу 97,5 милиони фунти за настапот, додека Дубоа ќе инкасира околу 52,5 милиони фунти. Покрај тоа, се очекуваат дополнителни приходи од продажба на билети и телевизиски права.