Уште еден Хрват во Вардар, „џинот“ Векиќ најново засилување
Откако вчера и официјално беше потврдено дека Анте Гаџа во следната сезона ќе биде ракометар на Вардар, новата управа на „црвено-црните“ денеска ангажира уште едно засилување.
Станува збор за уште еден ракометар од ППД Загреб, Јосип Векиќ.
Векиќ е 22-годишен ракометар кој е висок дури 210 сантиметри кој првиот дел од сезоната го помина во редовите на хрватскиот шампион и играше во Лигата на шампионите, по што во вториот дел беше испратен на позајмица во Дубрава.
Тој беше и во изборот на хрватскиот селектор Лино Червар за настап на Европското првенство но не успеа да се избори да влезе во конечниот список.
За очекување е Вардар да не застане тука со засилувањата туку до стартот на новата сезона да ангажира уште бек, со што би бил затворен ростерот на тимот кој во наредната сезона повторно ќе биде дел од Лигата на шампионите.