Десетици илјади луѓе во регионот на Нова Англија во САД и во источна Канада останаа без струја по ударот на бурата Ли, која донесе обилни врнежи од дожд и ветер кој корнеше дрвја.

Невремето се движи кон североисточниот дел на северноамериканскиот континент, а може да ги погоди канадските провинции Њу Бранзвик и Нова Шкотска.

Во Мејн, државата со најголема површина на шуми во САД, почвата е натопена, а дрвјата се многу ослабени поради невремето, но и поради обилните летни дождови, а како што најавуваат метеоролозите, најсилните удари на невремето допрва треба да се очекуваат.

„Ни претстои долг пат, а веќе гледаме соборени дрвја и прекин на електричната енергија“, изјави метеорологот Тод Фоази, пренесе АП.

Во Масачусетс беше прогласена вонредна состојба и беше испратена федерална помош.

На сила е предупредување за наплив на бура од границата на Њу Хемпшир и Мејн до Нова Шкотска, Канада.

Авионскиот сообраќај е во прекин на најголемиот аеродром во Нова Шкотска, Халифакс Стенфилд.