Инспекциските служби на Агенција за храна и ветеринарство (АХВ) спровеле 39 вонредни контроли во домови за стари луѓе во земјава. За сторени прекршоци од поголем обем изречени се глоби во вредност од 1.550 евра во денарска противвредност за 4 фирми што оперираат со храна во домовите, а само од еден контролиран оператор, уништени се 6 килограми небезбедна храна.

Според Агенцијата, само една фирма не била регистрирана како оператор со храна во АХВ, па ѝ е изречена времена забрана за работа, глоба, но и налог за нејзина регистрација.

„Еден оператор со храна не ги задоволувал хигиенските барања за безбедност на храната, а 4 од контролираните домови за стари лица немале спроведено задолжителен задравствен преглед за вработените лица. За утврдените недоследности кои се однесувале и на нередовно водење на записи за Добра хигиенска и Добра производствена пракса, недоставување на увид сертификати за спроведени обуки од областа на хигиената на храна, евиденција за набавки, доцнење со спроведување на задолжителни мерки за дезинфекција, дезинсекција и дератизација и други помали недоследности, издадени се и три решенија со наредби за нивно отстранување и две опомени“, соопштува АХВ.

Оттаму додаваат дека при спроведените вонредни инспекциски надзори кај истата категорија фирми во ноември 2024 година, 14 не биле регистрирани како оператори со храна во АХВ, а уништени биле 40 килограми небезбедна  храна. Издадени биле 16 решенија со наредби за отстранување на утврдени недоследности, а парични казни биле изречени на 18 домови за стари луѓе.