Една од темите на Комитетот за светско наследство кој одржа онлајн состанок за „Конвенцијата за заштита на светското културно и природно наследство“ чиј домаќин беше кинескиот град Фуџу, беше „Утврдување на листата на светското наследство и листата на светско наследство во опасност“ при што беше и ажурирана Листата на светско наследство во опасност.

Според донесените одлуки, српските средновековни споменици на Косово ќе останат на листата на УНЕСКО на светско наследство во опасност, пренесува Косово онлајн.

Српските средновековни споменици на Косово кои се наоѓаат на листа на УНЕСКО на светско наследство во опасност се манастирот Високи Дечани од 2004 година, како и Пеќката Патријаршија, манастирот Грачанициа и црквата Света Богородица Љевишка во Призрен од 2006 година.

Четирите културни добра во документите на УНЕСКО не се водат како византиско, ниту како српско православно наследство, туку како „Средновековни споменици на Косово“.

Косовските власти се обидуваат тие споменици да му ги припишат на Косово, не само во територијална смисла, туку и како споменично наследство на Косово, како дел од „косовскиот културен идентитет“.

Од друга страна, Србија во УНЕСКО се залага за спречување на се почестите прекројувања на историјата и преземањето на културното наследство мотивирано од политички причини и тежненија.

На Косово се наоѓаат вкупно 458 недвижни културни добра од посебна важност за Србија, од кои само 61 се добра од исклучително значење. На Косово се наоѓаат 1.300 цркви и манастири, кои го чинат културното наследство на српскиот народ од прв ред.