Под слоганот „Поп мај корн“ (Pop My Corn), на 2 и 3 декември, во просториите на мултимедијалниот центар „Мала станица“ во Скопје ќе се реализира првото издание на Фестивалот за современа уметност „Танц Бункер 01“.

Фестивалот е во организација на новиот колектив „Танц Бункер“, основан од кореографите Адријана Данчевска, Дејан Битровски и Ивана Балабанова. Поддржан од Министерството за култура на Република Северна Македонија, од Национална галерија „Мала станица“ и неколку локални партнери, фестивалот предвидува реализација на разновидна програма што сплотува повеќе уметници од современото творештво.

„Танц Бункер“ е резултат на иницијативата на тројцата истакнати уметници Данчевска, Битровски и Балабанова, кои препознавајќи ги недостатоците на сцената, иницираат нови форми на израз преку предвидените активности. Овие тројца кореографи и танчари, низ годините бележат значително голем обем на реализирани дела, дел од нив преку независната продукција, а дел преку работата на Скопје танцовиот театар и Културно-уметничкиот центар „Битрикс“.

Како млади, но истакнати кореографи на национално и интернационално тло, полека градејќи го својот идентитет на сцената Данчевска, Балабанова и Битровски се ангажираат околу создавањето на оваа нова приказна, мотивирани од идејата да ја истакнат современата уметност на повисоко ниво, а проактивно делувајќи кон локална и интернационална соработка и прогресивен израз.

– Со идеја за сплотување на современата уметничка сцена и креирање нови модели на соработка, „Танц Бункер 01“ со слоган „Поп мај корн“ е протест, крик, мозаик на индивидуални изрази и нов пристап кон ко-креација на повеќе уметници, како и зачеток на нови соработки промовирајќи сплотеност, здруженост и креативна акција. „Танц Бункер“ е и обид за еманципирање на локалната публика кон нови современи движења и нејзино отворање кон нови пристапи во пласман на современи дела – објасни Ивана Балабанова.

Програмата на овогодишниот фестивал опфаќа пред-забава во локалното кафуле „Котур“, отворање на фестивалот на 2 декември во мултимедијалниот центар „Мала станица“ и танцови работилници кои ќе се одржат во Националната опера и балет на 3 декември.

Истражувајќи на тема „Тело во движење“ повеќе локални уметници создадоа свои дела, па така на 2 декември на фестивалот ќе се претстават: „Врело тело“ (Boiling Bodies) на уметниците Елена Чемерска и Ивана Мирческа – хибридна уметничка инсталација којашто ги истражува состојбите на телесен умор преку видео, звук и скулптурални објекти, потоа „Сè ќе биде добро“ – избрани дела на Ивана Мојсовска, како и трите кореографски дела: „Солзите на кловнот“ на Адријана Данчевска, „Баронот“ на Дејан Битровски и „Моја крв, мои политики“ на Ивана Балабанова.

Во соработка со Ивана Мојсовска, Адријана Данчевска ќе претстави и свои кратки филмови каде како раководители на камера се појавуваат Тео Ангеловски и Борис Ралев. Покрај Балабанова и Битровски, во перформансите учествуваат и танчарите Стефани Шааршмидт, Анастасија Данчевска, Викторија Коцева и Нина Петрушевска, а музиката е на композиторите Алесандро Ола и Александар Гроздановски – Херцел. Фестивалската вечер ќе се заокружи со диџеј-сет на Александар Гроздановски – Херцел.

(Текстот е објавен во „Културен печат“ број 207, во печатеното издание на весникот „Слободен печат“ на 2-3.12.2023)