Недим Рама, угостител од Чаир, е назначен за нов извршен директор на државната компанија „Номагас“, која оперира со преносот на природен гас и ги гради гасоводите во земјава.

Рама, за кого неодамна се пишуваше дека може да стане министер за животна средина, доаѓа на местото на досегашниот прв човек на „Номагас“, Мухамет Елмази, кој на локалните избори стана градоначалник на Општина Сарај.

Како што пишува „Фактор“, новиот директор Рама е ортак со заменик-министерката за транспорт, Калтрина Зеколи Шаќири, се која се сопственици на ресторанот и кафе-бар во Скопје-Север, кој е меѓу најпопуларните угостителски објекти во Општина Бутел. Заедно со Зеколи Шаќири се сопственици на фирмата „Неар 2015“ која како подружница го поседува „1Sh Lounge Bar“ во Скопје-Север.

На профилот на Рама на социјалната мрежа „Линкдин“ пишува дека тој исто така е ко-основач на ИТ-компанијата Host.mk.

Тој од август 2024 фигурираше како посебен советник за економски прашања и шеф на кабинетот на досегашниот министер за животна средина и вицепремиер Изет Меџити, кој на изборите минатиот месец стана градоначалник на Чаир.