Кошаркарската репрезентација на Македонија со пораз од актуелниот шампион Шпанија ги започна квалификациите за пласман на Светското првенство кое ќе се игра 2023 година.

Ослабени за неиграњето на повредените Војдан Стојановски, Ненад Димитријевиќ, Стојан Ѓуровски, болниот Љубомир Младеновски како и Андреј Јакимовски кој игра во НЦАА лигата во САД, „црвено-жолтите“ загубија со 65:94, но репрезентацијата доби нов кошаркар кој треба да биде носителот на играта во наредните 10-15 години, Теодор Симиќ.

Младиот центар се најде во првата постава и максимално ја искористи довербата на селекторот Драган Бајиќ, за 16 минути поминати на паркетот во СЦ „Јане Сандански“ постигна 18 поени.

Актуелниот светски шампион иако не настапи со најсилниот тим, во целост го оправда епитетот на фаворит во дуелот со Македонија и по воведните минути кои им припаднаа на „црвено-жолтите“ брзо ги презедоа работите во свои раце и првата четвртина ја добија со 14:21. На стартот од вторите десет минути со поените на Сима дојдоа и до двоцифрена предност (14:24) која рутински ја одржуваа до полувремето (30:41).

На стартот од третата четвртина, „црвената фурија“ веднаш направи серија од 0:7, а во 25 минута дојде и до предност од 20 поени (34:54) по што беа решени сите дилеми околу победникот.
До крајот на натпреварот Шпанците рутински ја одржуваа предноста за конечен триумф од 65:94.
Покрај одличниот Симиќ, добра партија прикажа и Џејкоб Вајли со 10 поени како и Робер кој постигна девет поени, додека на спротивната страна, Сима со 17 и Лопез Аростеги со 15 поени беа најдобри.
Во второто коло кое се игра на 29 ноември, Македонија ќе и гостува на Украина која претходно загуби од Грузија со 83:88.