У17: Македонските фудбалери го декласираа Гибралтар и ќе играат во елитната фаза за пласман на ЕП
Македонската фудбалска репрезентација до 17 години со убедлива победа од 9:0 над Гибралтар, на крајот го освои второто место во групата 2 и се пласираше во елитната фаза за пласман на Европското првенство, благодарение на подобрата гол разлика од Унгарија, која загуби убедливо од Чешка во последното коло од квалификациите кои се одиграа во Струмица и Турново.
Препорачано
Македонија денеска на стадионот во Турново беше доминантна над противникот, даде девет, а можеше разликата да биде и двоцифрена ако беа искористени уште неколкуте добри шанси.
Серијата на голови почна во 23 минута кога Михајловски „сервира“ одлична топка до тројниот стрелец Папалиски, кој немаше проблеми да го совлада противничкиот голман. 11 минути подоцна во листата на стрелците се запишува и Љачка. Соло продор на Папалиски по левата страна кој додаде до Љачка, а овој од прва го совлада Бонфанте. До крајот на полувремето уште два гола. Најпрво во 41 минута Џангаровски асистира до Михајловски кој лесно ја спроведе топката во мрежата, а во претпоследната минута од полувремето Папалиски по центаршут од левата страна на Митревски, упати млак, но крајно прецизен удар за 4:0 на полувремето.
Во вториот дел стрелците беа уште порасположени за голови. Во 53 минута Цветковски „собра“ одбиена топка и го зголеми резултатот. Три минути подоцна Џангаровски најдобро се снајде во шеснаесетникот за шести гол во мрежата на Гибралтар. Во 61 минута пенал за Македонија откако голманот Бонфанте стартуваше над Џангаровски. Истиот играч го претвори во погодок.
Папалиски го комплетираше „хет-трикот“ во 68 минута кога со удар од 20 метри го совлада противничкиот голман. Последниот гол беше во 89 минута дело на Мамути откако од десетина метри успеа да ги постави конечните 9:0.
У-17, КВАЛФИИКАЦИИ ЗА ЕП, ПРВА ФАЗА
МАКЕДОНИЈА – ГИБРАЛТАР 9:0 (4:0)
Стадион: Кукуш во Турново.
Судија: Дмитрио Кубриак (Украина).
Стрелци: Папалиски 23′, 44′, 68′, Љачка 34′, Михајловски 41′, Цветковски 53′, Џанаровски 56′, 61′ (п), Мамути 89′
Ж. Картони: Чедомирски (М) – Бонфанте, Дракес, Поџио (Г).
МАКЕДОНИЈА У17: Грчевски, Цветковски, Иванов, Михајловски, Митев, Митревски, Чедомирски (76′ Бајрами), Љачка, Џангаровски, Мамути, Папалиски.
Селектор: Владимир Колев.
РЕЗУЛТАТИ, 3. КОЛО:
ГИБРАЛТАР – МАКЕДОНИЈА 0:9
УНГАРИЈА – ЧЕШКА 1:7
ТАБЕЛА:
1. ЧЕШКА 3 3 0 0 22:1 9
2. МАКЕДОНИЈА 3 1 1 1 11:4 4
3. УНГАРИЈА 3 1 1 1 11:9 4
4. ГИБРАЛТАР 3 0 0 3 0:30 0
