В сабота од 18.00 часот во Словенија ќе се игра првиот натпревар од ЕХФ Европскиот куп помеѓу ракометните клубови на Цеље и ГРК Охрид.

Овој меч во салата „Златорог“ ќе го судат Босанците Александар Јовиќ и Недим Арнаутовиќ, а ЕХФ делегат е Ешреф Беќири од Косово.

Доколку македонскиот претставник излезе како победник во овој двомеч, во финалето ќе игра со Извиѓач од Босна и Херцеговина или унгарската Татабања.

Своите очекувања за првите 60 минути ги сподели тренерот на Цеље, Клемен Лузар кој го пофали тимот на ГРК Охрид:

– Охрид има високи амбиции оваа сезона. Тие го покажуваат тоа и во домашното првенство, двапати го победија, нема да кажам лесно, тимот на Еурофарм Пелистер, кој играше во Лигата на шампионите. Тие исто така загубија од Вардар 1961, кој е навистина силен, само со еден гол разлика оваа година. Имаат многу странци, имаат високи европски амбиции. Играат добар ракомет, но инаку нивната игра се базира на силна одбрана. Затоа очекувам навистина тежок, квалитетен натпревар. Нема да направиме ништо посебно во однос на подготовката за нив. Знаеме дека она што го правиме, го правиме добро. Дека не се прилагодуваме на другите. Исто така, би било тешко со сите овие натпревари што ги имаме во овој ритам. Затоа навистина очекувам спектакл, вистински натпревар и убава саботна вечер – се зборовите на Лузар на клупскиот сајт.