Американскиот претседател Доналд Трамп ѝ порача на Куба да „направи договор“ или да се соочи со неодредени последици, додавајќи дека повеќе нема да има венецуелска нафта или пари за комунистички управуваниот карипски остров, кој со децении е противник на САД, објави „Гардијан“.

Додека Куба, близок сојузник на Венецуела и еден од најголемите корисници на нејзината нафта, се подготвува за можни масовни немири по соборувањето на Николас Мадуро од функцијата лидер на јужноамериканската држава, американскиот претседател во неделата ја заостри својата реторика со закани.

„Нема да има повеќе нафта или пари за Куба – нула! Силно им препорачувам да направат договор, пред да биде предоцна!“, напиша Трамп на својата платформа „Трут сошал“.

Тој не прецизираше каква форма би можел да има таков договор.

„Не може некој што прави бизнис од убивање луѓе да ни држи лекции“

Кубанскиот претседател Мигел Дијаз-Канел остро реагираше на заканите од Вашингтон, оценувајќи дека оние кои „сè претвораат во бизнис, дури и човечките животи“, немаат морално право да ѝ држат лекции на Куба.

Родригез: Венецуела ќе се спротивстави на агресијата на САД преку дипломатски средства

Според него, нападите врз Хавана произлегуваат од гнев поради суверената одлука на кубанскиот народ сам да го избере својот политички модел. Дијаз-Канел порача дека обвинувањата кон Револуцијата за економските тешкотии се лицемерни, бидејќи и самите критичари знаат дека тие се директна последица на повеќедецениските американски санкции, кои, како што предупреди, сега се закануваат дополнително да се заострат.

Тој нагласи дека Куба не се заканува никому, но е подготвена да ја брани својата татковина „до последната капка крв“.

„Добро ми звучи Рубио да биде претседател на Куба“

Венецуела е најголемиот снабдувач на нафта за Куба, но поради строгата американска нафтена блокада, податоците за испораките покажуваат дека од минатата недела – по апсењето на Мадуро од американските сили – ниеден танкер не испловил од венецуелските пристаништа кон Куба.

Десетици венецуелски и кубански припадници на безбедносните сили загинале во американската акција, по што Трамп изјави дека Куба е „спремна да падне“, наведувајќи ја длабоката економска криза на островот и дека за Хавана ќе биде тешко да „издржи“ без евтината венецуелска нафта.

Претходно во неделата, Трамп сподели порака во која се сугерира дека американскиот државен секретар Марко Рубио, чии родители се кубански имигранти, би можел да стане нов претседател на Куба, додавајќи: „Мене ми звучи добро!“

Во друга порака кратко потоа, Трамп напиша дека Куба „со години живеела од големи количини нафта и пари од Венецуела. За возврат, Куба обезбедувала ‘безбедносни услуги’ за последните двајца венецуелски диктатори – но повеќе не!“

„Повеќето од тие Кубанци се мртви по американскиот напад минатата недела, а на Венецуела веќе не ѝ е потребна заштита од насилниците и уценувачите кои ја држеа како заложник толку години,“ напиша американскиот претседател.

Венецуелката Марија Корина Мачадо ја доби Нобеловата награда за мир за 2025 година