Трамп рече дека нема да оди на самитот на Г20 поради „геноцидот во Јужна Африка“ — ништо од средбата со Зеленски и со Путин
Американскиот претседател Доналд Трамп изјави во средата дека нема да присуствува на претстојниот самит на Групата 20 (Г20), што треба да се одржи во Јоханесбург на 22 и 23 ноември, поради неговите критики кон политиките за човекови права на Јужна Африка, објави „Киев индепендент“.
Препорачано
Трамп го изјави тоа само неколку дена по предлогот на финскиот претседател Александар Стаб за можен состанок меѓу лидерите на Украина, Русија и САД на маргините на самитот.
„Јас нема да ја претставувам нашата земја таму. Не треба да се одржува таму. Како можеме да очекуваме да одиме во Јужна Африка на толку важен Г20 состанок, кога конфискацијата на земја и геноцидот се главни теми на разговор?“ им рече Трамп на новинарите, мислејќи на локацијата на самитот.
Трамп повеќепати ја обвини Јужна Африка за злоупотреби на човековите права против белите Јужноафриканци — Африканери, издавајќи извршна наредба во февруари со која го осуди наводното одземање на земјоделски имот на етничките малцинства без надомест.
Од своја страна, Јужна Африка ги отфрли обвинувањата, нарекувајќи ги тврдењата на Трамп „фактички неточни“.
Трамп се обидува да организира лична средба меѓу рускиот претседател Владимир Путин и украинскиот претседател Володимир Зеленски како дел од неговите напори за завршување на војната во Украина.
Тој претходно изјави дека американскиот потпретседател Џеј Ди Венс ќе ги претставува САД на самитот на Г20. Од Кремљ потврдија дека Путин исто така нема да присуствува, а наместо него ќе оди заменик шефот на претседателскиот кабинет, Максим Орешкин.
Кремљ одамна избегнува вакви билатерални или трилатерални средби, тврдејќи дека „одредени услови“ мора да бидат исполнети пред разговори и предлагајќи дека преговорите со Зеленски би можеле да се одржат само во Москва.
Месеците на иницијативи на Трамп за завршување на војната во Украина, кои честопати се менуваат со радикални промени во политиката на Вашингтон, досега покажаа мал напредок бидејќи Москва одбива прекин на огнот и инсистира на територијални барања.
Планираниот самит меѓу Путин и Трамп во Будимпешта беше откажан откако американската администрација сфатила дека Кремљ не е подготвен на никакви отстапки.
Трамп ги избегнуваше и средбите со Зеленски на меѓународните самити. На пример, за време на јунискиот Г7 самит во Канада, тој си замина еден ден пред пристигнувањето на Зеленски поради нараснатите тензии на Блискиот Исток.
Откако се врати на власт во јануари, Трамп се има сретнато со Путин само еднаш — на самит во Алјаска на 15 август.
Кремљ смета дека нема потреба наскоро да се одржи средба меѓу Трамп и Путин
