Доналд Трамп ја исклучи можноста да се кандидира за потпретседател во 2028 година, потег за кој некои поддржувачи велат дека би можел да му помогне да го заобиколи ограничувањето од два мандата за претседателствување според Уставот на САД, објави Блумберг.

„Имам право да го направам тоа“, им рече Трамп на новинарите додека се качуваше во авионот „Ер Форс Уан“ од Малезија до Јапонија.

„Нема да го направам тоа“, додаде тој, проценувајќи дека на овој начин „би играл паметно“ и „не би било убаво“.

Трамп, кој беше претседател на САД од 2017 до 2021 година и го започна својот втор мандат на 20 јануари, честопати јавно се осврнува, без да ги отфрла, на повиците на своите поддржувачи да се кандидира за трет мандат, и покрај фактот дека Уставот на САД го забранува тоа.

Тој, исто така, постојано покажуваше црвени капи со натпис „Трамп 2028“, годината на следните претседателски избори.

Еден од најпопуларните предлози во светот на Трамп е 79-годишниот милијардер да биде кандидат за потпретседател за три години, а за претседател ќе се кандидира сегашниот потпретседател Џеј Ди Венс.

Во ова сценарио, доколку победи, Венс би поднел оставка и автоматски би бил заменет од Трамп, кој на тој начин би можел да остане во Белата куќа, заобиколувајќи го 22-риот амандман на Уставот на САД, кој предвидува дека никој не може да биде избран за претседател на Соединетите Американски Држави повеќе од двапати.

„Трамп ќе биде претседател во 2028 година, луѓето мора да се навикнат на таа идеја“, неодамна изјави за „Економист“ Стив Банон, еден од главните идеолози на движењето МАГА.

„Постои стратегија“ за да се направи ова, која ќе биде откриена „во догледно време“, инсистираше инфлуенсерот и поранешен советник на американскиот претседател.