Кеир Стармер е предупреден дека неговиот однос со Доналд Трамп може да биде непоправлив, откако американскиот претседател со подбивна имитација го исмеа британскиот премиер затоа што се советувал со својот тим за воени одлуки. Во ново влошување на односите меѓу Обединетото Кралство и САД, Трамп на велигденски ручек во Белата куќа наводно го имитирал Стармер со слаб глас и изјавил дека Обединетото Кралство „не е нашиот најдобар“ сојузник, пишува Гардијан.

Овој испад е најнов во низата напади на Трамп врз Стармер и „старите“ британски носачи на авиони, а уследи откако премиерот одби да дозволи САД да користат британски воени бази за првите удари врз Иран.

По настапот на Трамп, дипломатски и политички кругови порачаа дека Стармер постапил правилно што ги отфрлил критиките, но додаваат дека односот е сериозно нарушен и дека ќе мора да ги удвои напорите во градењето меѓународни врски на други страни.

Трампова подбивна изведба

Американскиот претседател изјави дека Обединетото Кралство „треба да биде нашиот најдобар“ сојузник, но дека тоа не било случај за време на војната во Иран, обвинувајќи го Стармер за двоумење околу испраќањето носачи на авиони.

За време на својот говор, Трамп рече: „Го прашав Обединетото Кралство, кое треба да биде нашиот најдобар сојузник. Всушност, кралот доаѓа тука за две недели, тој е добар човек, кралот Чарлс“.

„Но треба да бидат наши најдобри, а не беа. Реков: ‘Имате два стари, дотраени носачи на авиони, мислите ли дека би можеле да ги испратите?’“, продолжи Трамп, имитирајќи го одговорот на Стармер: „‘Оххх, ќе морам да го прашам мојот тим.’ Му реков: ‘Вие сте премиер, не мора да го правите тоа.’ ‘Не, не, не, морам да го прашам мојот тим. Мојот тим мора да се состане, се состануваме следната недела.’ ‘Но војната веќе почна. Следната недела војната ќе биде завршена, за три дена’“, раскажа Трамп.

Сепак, извори од Даунинг стрит тврдат дека Трамп никогаш не побарал пловила од Обединетото Кралство и дека Британија не ги понудила. Во претходна критика пред две недели, Трамп рече дека Стармер се советувал со својот тим за испраќање миноловци, а не носачи на авиони.

Поддршка за Стармер во Британија

Лабуристички министри и пратеници му дадоа силна поддршка на Стармер, истакнувајќи дека останува смирен пред гневот и навредите на Трамп.

Некои сметаат дека неговото управување со кризата со Иран и односот со американскиот претседател ги зајакнува аргументите да остане на чело на партијата, без оглед на исходот од локалните избори следниот месец.

Емили Торнбери, лабуристичка пратеничка, изјави дека ѝ е драго што во Обединетото Кралство има лидер кој работи со тим и ги слуша експертите.

Нападот на Трамп создаде проблеми за партијата Реформ УК на Најџел Фараж и за конзервативците, кои првично го поддржаа американското бомбардирање на Иран, но во меѓувреме ја ублажија својата поддршка.

Роберт Џенрик од Реформ УК изјави за ЛБЦ дека односот меѓу премиерот и американскиот претседател „очигледно претрпел огромен удар, веројатно непоправлив“. Но нагласи дека никако не го брани Трамп „ниту начинот на кој се однесува, далеку од тоа“.

„Не сакам да гледам странски лидери како го навредуваат лидерот на Обединетото Кралство, без разлика на која партија припаѓа. Сакате нашиот премиер да биде некој што е почитуван на светската сцена и кого нашите главни сојузници го третираат со почит“, рече Џенрик.

Одговорот на Стармер

Изјавите на Трамп беа дадени на ручек затворен за медиумите, но Белата куќа ги објави на социјалните мрежи, а потоа ги избриша. Снимката ја презеде и повторно ја објави политички новинар од американскиот портал Бизнис Инсајдер.

Трамп на истиот настан се потсмеваше и на Емануел Макрон, велејќи дека францускиот претседател „сѐ уште се опоравува од удар во вилицата“, и тврдејќи дека неговата сопруга Брижит Макрон „исклучително лошо се однесува кон него“.

Стармер не возврати на навредите, но порача дека ќе остане на својот став за војната „без оглед на притисокот и бучавата“.

На прашање на парламентарна комисија за „прилично грубите“ коментари на Трамп, премиерот рече:

„Целосно сум фокусиран на она што е во најдобар интерес на нашата земја и не се извинуваам поради тоа. Без оглед на притисокот што доаѓа од други страни, ќе останам исклучиво фокусиран на она што е во британскиот национален интерес“.

„Многу од тоа што се кажува или прави несомнено е кажано и направено за да се изврши притисок врз мене, во тоа не се сомневам. Разбирам што се случува. Но нема да попуштам по тоа прашање“, заклучи тој. „Јас сум британски премиер и моја работа е да бидам апсолутно фокусиран на британскиот национален интерес. Тоа добро ми служеше во изминатите недели и тоа е принципот до кој ќе продолжам да се придржувам“.

„Трамп премногу зборува“ – Макрон не можеше веќе да молчи на шегите од претседателот на САД

Како „токсичната“ војна на Трамп со Иран ја разби европската десница