Претседателот на САД Доналд Трамп објави дека ќе ги зголеми царините за автомобили и камиони од Европската Унија на 25 проценти, објави „Гардијан“.

Во објава на социјалната мрежа Truth Social, претседателот на САД напиша дека „затоа што Европската Унија не се придржува до нашиот целосно уреден трговски договор, следната недела ќе ги зголемам царините што ѝ се наплаќаат на Европската Унија за автомобили и камиони што влегуваат во САД“.

Царината ќе се зголеми на 25 проценти.  Целосно е договорено дека, доколку произведуваат автомобили и камиони во фабриките во САД, нема да има царина. Многу фабрики за автомобили и камиони се во изградба, со инвестирани над 100 милијарди долари, рекорд во историјата на производството на автомобили и камиони. Овие фабрики, со персонал од американски работници, ќе се отворат наскоро – никогаш не се случило нешто слично на она што се случува во Америка денес, напиша Трамп.

Трговскиот договор, кој беше склучен минатото лето, ја ограничи американската царина за автомобили и делови од ЕУ на 15 проценти, што е пониско од царината од 25 проценти што Трамп ја воведе на многу други трговски партнери.