Тимо Вернер е блиску до заминување од Челси
Тимо Вернер дојде во Челси како едно од најголемите засилувања летото 2020 година во трансфер вреден околу 53.000.000 евра од Лајпциг, но не се прослави во изминатите две сезони.
Германскиот напаѓач одигра 56 натпревари во Премиер лигата и постигна 10 гола, премалку за играчот од светска класа за каков што го сметаа лондонските „сини“.
Јасно е дека 26-годишниот Вернер не се вклопуваше во стилот на играта на Челси, па заминувањето од клубот можеби е најдоброто решение.
Во претходните денови напаѓачот беше поврзуван со трансфер во Јувентус, а денеска шпанските медиуми тврдат дека Вернер е интересен за европскиот шампион Реал Мадрид.
Јасно е дека во Мадрид би ја имал улогата на резерва за Карим Бензема, кој по заминувањата на Мајорал и Јовиќ само во Маријано Дијаз има конкуренција за место на теренот.