44-годишна жена е тешко повредена во силна екплозија на гас што се случила денеска во охриското село Велгошти. Како што соопштија од противпожарната служба Охрид, брзата реакција на пожарникарите спречила ширење на огнот.

„Во текот на денешниот ден ТППЕ Охрид, интервенираше на санирање на последиците од разорна експлозија во куќа во Охрид, с.Велгошти. Експлозијата е предизвикана од зголемена концентрација на гасови (плин) и останати фактори, кои придoнеле за високо ниво на експлозивност. Благодарение на брзата реакција на пожарникарите, спречено е и опожарување на објектот. Повредена е една жена, која е преземена од екипите на Брзата помош“, соопшти ТППЕ Охрид.

Настанот го потврдија и од охридската полиција, наведувајќи дека пожарот избил околу 11 часот.

„На 06.02.2026 година во 10.58 часот, во СВР Охрид е пријавено дека избувнал пожар во куќа во охридското село Велгошти при што, Е.Т.Ѓ.(44) од истото село се здобила со тешки телесни повреди, констатирани во Општата болница во Охрид. Интервенирала Територијалната противпожарна единица од Охрид“, соопшти охридската полиција.

Се преземаат мерки за утврдување на причините за пожарот.