Светски познатиот пејач Марк Ентони (57) и неговата 31 година помлада сопруга, поранешната мис Парагвај, Надија Фереира, открија дека го очекуваат своето второ дете. Среќната вест двојката ја сподели денеска преку заедничка објава на Инстаграм, по повод третата годишнина од нивниот брак.

Тие открија и дека нивниот син Марко наскоро ќе стане постар брат.

„Среќна трета годишнина од бракот! Каков голем подарок ни подари животот. Бог е голем. Маркито ќе стане голем брат“, напишаа тие во описот на фотографијата.

 

View this post on Instagram

 

A post shared by Nadia Ferreira Muñiz (@nadiaferreira)

На објавената фотографија јасно се гледа трудничкиот стомак на Надија Фереира, додека рацете на Марк Ентони, нивниот син Марко и самата Надија се положени врз нејзиниот стомак.

Покрај синот Марко, Марк Ентони е татко и на уште шест деца од претходни врски. Со поранешната партнерка Деби Росадо ги има ќерката Аријана (31) и синот Чејс (28). Со поранешната сопруга Дајанара Торес ги има синовите Кристијан (25) и Рајан (22), додека со поранешната сопруга Џенифер Лопез ги има близнаците Ема и Максимилијан (17).

Гласините за врската меѓу Марк Ентони и Надија Фереира започнаа на почетокот на 2022 година, откако беа забележани заедно во Мексико Сити. Својата врска официјално ја потврдија во март истата година со заедничка фотографија на Инстаграм.

Три месеци подоцна ги објавија свршувачките за време на забава во ресторанот „Sexy Fish“ во Мајами, а на 28 јануари 2023 година се венчаа на гламурозна церемонија во истиот град, на која присуствуваа бројни познати личности.