Министерот за здравство, Арбен Таравари, од владината коалиција Вреди како приватна журка и забава ја коментираше  паралелната прослава на ДУИ по повод 23-годишнината од Охридскиот рамковен договор, најавена за утре. Утрово Европскиот фронт соопшти дека утре напладне организира Академијата за легитимитет во хотелот „Александар Палас“ во Скопје.

– Некако ДУИ секогаш има тенденција да приватизира одредени настани. Сѐ уште не можат да прифатат дека се опозиција, меѓутоа им треба време и ќе се навикнат на тоа, ќе прифатат. Приватни журки, забави, може секој да организира. Ние ги повикавме на утрешниот настан кој го организира Владата на Република Макеоднија, добредојдени се, а приватни журки нека продолжат, нека си организираат. Историските настани никогаш не биле приватна припадност на некој, секогаш ќе бидат настани коишто припаѓаат на граѓаните коишто живеат тука – рече Таравари.

Коалицијата Вреди уште во петокот ги покани ДУИ да учествуваат на заедничкото државно одбележување на 23-годишнината од потпишувањето на Охридскиот рамковен договор и обвини дека со паралелната прослава на овој важен историски датум Али Ахмети ги „девалвира придобивките за Албанците од Охридскиот рамковен договор“.

– Албанскиот патриотизам не смее да се стави во функција на одбрана на криминал и нечесни политичари. Загинатите и живите борци на УЧК, како и потписниците на Рамковниот договор Имер Имери и Арбен Џафери имаа искрени намери и не се бореа и не работеа за наместени тендери и лично богатење – порача во петокот Саранда Имери, ќерка на покојниот политичар Имер Имери и ги повика ДУИ да не прават раздор кај албанскиот народ само затоа што се во опозиција.