Денеска од 18.00 часот во Нашице екипата на Еурофарм Пелистер ќе го игра вториот натпревар од групата „А“ во СЕХА лигата. Нов ривал на македонскиот вицешампион е хрватскиот Нексе, и двете екипи на стартот претрпеа порази од српската Војводина.

Тренерот на битолчани, Ларс Валтер вели дека Нексе е одличен тим, неговите ракометари ќе бидат подготвени и имаат добри шанси да одиграат израмнет натпревар.

– Нексе е одличен тим, но видовме дека ја направија истата грешка, како и ние против Војводина. Среде подготовки сме, оставивме неколку ракометари дома за да ги заштедиме, и затоа не изгледавме добро во Нови Сад. Но, сега имаме два дена за подготовка и ќе бидеме подобри. Проблем ни е што немаме многу ракометари тука во Нашице, дојдовме само со четири бека за да покријат 60 минути, што не е многу. Најголемиот проблем за поразот против Војводина беа техничките грешки кои ги направивме. Ги имавме дури 19, што не е нормално. Тоа ни се случи бидејќи сме во подготвителен период. Физичките тестови минатата недела беа добри, па сега работиме само на ракомет и треба да се подобриме. Имаме добри шанси да играме израмнет натпревар против Нексе и ќе бидеме подготвени за тој дуел – рече Валтер.

Според играчот на Еурофарм Пелистер, Марио Танкоски овој меч ќе биде можност за поправање на впечатокот.

– Нексе оваа година игра добар ракомет, први се во групата во Европската лига. Се работи за одлична екипа, но и тие во Нови Сад убедливо загубија и лошо играа, исто како и ние. Овој натпревар и за нас и за нив ќе биде можност за поправање на впечатокот. По репрезентативни настапи нормално е да има вакви осцилации. Ќе бидеме подобри во следниот период, ни претстои тежок февруари и два натпревари секоја недела. Мора да се подигнеме за да извлечеме убави резултати – се зборовите на Танкоски.