Службите за брза помош ширум Европа регистрираа за 60 проценти повеќе повици од жени жртви на семејно насилство за време на изолацијата воведена поради пандемијата со Ковид-19, предупреди денеска европската канцеларија на Светска здравствена организација.

Семејното насилство над партнерот или детето има тенденција на зголемување во периодот на криза, посебно со рестриктивните мерки и изолацијата, воведени поради ширењето на новиот коронавирус.

– Земјите-членки во април утврдија зголемување за 60 отсто на итните повици од жени жртви на насилство од страна на партнерите во однос на минатата година – изјави директорот на европската канцларија на СЗО, Ханс Клуге на прес-конференција во Копенхаген.

Тој додаде дека такво зголемување е регистрирано речиси во сите земји.