Хрват на 57-годишна возраст вчера беше осуден на 12 години затвор во Австрија откако со нож си го убил пријателот поради расправија за Југославија, објави „Експрес“.

Настанот се случил на 29 ноември минатата година, кога двајцата мажи се сретнале во стан на жена која им била заедничка пријателка, во градот Виена. Сите тројца потекнувале од поранешна Југославија.

За време на собирот, групата пиела пиво и „Јегермајстер“. Подоцна било утврдено дека обвинетиот имал 2,2 промили алкохол во крвта во моментот на инцидентот.

Сепак, според психијатриско вештачење побарано од обвинителството, тој бил навикнат на такви нивоа на алкохол и затоа бил целосно кривично одговорен.

Подоцна во вечерта, различни ставови меѓу тројцата за југословенските војни од 1990-те ескалирале во кујната.  Жената, наводно српска националистка, не се согласувала со ставовите на мажите. Обвинетиот, Хрват, неколку години се борел во војната, додека, пак, неговиот пријател бил босански Хрват.

Пријателот на крај станал физички агресивен и наводно ја турнал жената на земја.

„Ја удри. Реков: ‘Што правиш? Дали си луд?’ Ми се закани: ‘Затвори ја устата или истото ќе ти се случи како и нејзе.’ Тогаш, за жал, изгубив контрола. Во мене сè експлодираше“, изјавил обвинетиот.

Тој станал и го зел првиот нож што го нашол во кујнската фиока. Го пробол пријателот двапати во грб, при што еден од ударите бил толку силен што му го пробол срцето.

Неговиот пријател, на 49-годишна возраст, починал на самото место.

„Знам дека го убив. Не сакав тоа да се случи. Сакав само да го повредам“, изјавил обвинетиот на судењето.

Одбраната се повика на неговото чисто криминално досие, нагласувајќи дека самиот ги повикал полицијата и итната помош и чекал да биде уапсен во дворот.

Пресудата сè уште не е правосилна.

Србин пробол двајца луѓе во Минхен, една од повредените му била поранешна девојка