Облогата на дното на Рефлекторскиот базен во Вашингтон била исечена со остар нож или со жилет, при што била оштетена заштитната изолација поставена во рамки на проектот за реконструкција вреден 16 милиони долари, објави „ Асошијетед прес“.

Американската паркова полиција реагирала на 9 јуни по пријава од службата за паркови, изјави Френк Лендс, заменик-директор за операции во службата.

Лендс ја дал оваа изјава во судски документ поднесен доцна во средата, како дел од тужба поднесена од непрофитна организација која бара да се запре работата на администрацијата на Трамп на проектот.

Во неговата изјава не се наведува точно кога настанала штетата, ниту дали станува збор за сомнителен случај на вандализам.

Полицискиот извештај укажува на оштетување на базенот, „вклучително и заптивна маса над пенестата изолација која била пресечена со остар нож или со жилет, како и уништување на површински материјал што се одвојувал“, изјави Лендс.

Според него, околу 70 врвови од столбови на оградата биле фрлени во базенот.

Ова е првпат републиканската администрација да понуди конкретни детали за тоа кога и како можеби бил оштетен Рефлекторскиот базен, откако работите на проектот биле во голема мера завршени.

Можни сценарија за „финален удар“ врз Иран

„Станува збор за изолиран инцидент“

Портпарол на Министерството за внатрешни работи изјави дека јавноста не била веднаш известена за штетата бидејќи во моментот на инцидентот, се верувало дека станува збор за изолиран случај.

Во приближно истиот период, вработените во службата за паркови „откриле уште еден инцидент при кој оградата околу базенот била насилно отстранета и фрлена во водата“, изјавил портпаролот во електронска порака.

Министерството наскоро забележало дека „почнале да се појавуваат повторливи случаи и видеоснимки на луѓе кои ја кинат облогата. Тогаш сфативме дека ова не е изолиран инцидент, туку нов тренд на обиди за оштетување на Рефлекторскиот базен“, се наведува во пораката.

Доналд Трамп и други официјални претставници повеќепати, без да приложат докази, обвинија неидентификувани вандали за лупењето на бојата, како и за „пукнатина“ во облогата и за други проблеми. Трамп оваа недела изјави дека шест луѓе биле уапсени, без да даде дополнителни детали.

Министерството за внатрешни работи вчера соопшти дека досега биле извршени седум апсења, издадени седум федерални прекршочни налози и поднесени 18 полициски извештаи. Не било наведено за какви обвиненија станува збор.

Трамп вети дека ќе го разубави базенот

Трамп вети дека ќе го разубави повеќе од еден век стариот Рефлекторски базен пред прославата на 250-годишнината од основањето на САД, при што водата била испуштена, а дното било обоено во боја што тој ја нарече „сина како американското знаме“.

Но, по обновата на локалитетот, водата повеќе од една недела била зафатена од цветање на алги, а делови од новата облога почнале да се лупат од дното.

Во последните денови базенот во голема мера се исчистил откако уреди наречени наномеурчиња внесувале озон во водата за да ги уништат алгите и бактериите.

Администрацијата на Трамп се соочува со самонаметнат рок реконструкцијата да биде завршена пред 4 јули. Трамп исто така изјавил дека федералната влада ќе објави фотографии како доказ за неговите тврдења.

Тој претходно изјави дека „болни луѓе“ користеле жилети и ножеви за пакети за да исечат делови од облогата.

Демократите во Конгресот повикаа на формални истраги за реновирањето на Рефлекторскиот базен, наведувајќи дека договорите без тендер биле доделени на компании со претходни врски со Трамп.

Компанијата „Грин Ватер Солушнс“, со седиште во Охајо, позната и како „Гринвотер Сервисис“, добила договор вреден 1,7 милиони долари за инсталирање на систем за прочистување на водата во Рефлекторскиот базен, додека компанијата „Атлантик Индастријал Коатингс“ од Вирџинија добила 14,7 милиони долари за пребојување и хидроизолација на бетонското дно на базенот.

Трамп е опседнат со мене, вели Обама