Кајли Џенер се соочува со нова тужба од поранешна вработена. Нејзина поранешна приватна готвачка тврди дека напорните работни услови и физички тешките задачи што ѝ биле доделувани за време на високоризична бременост довеле до спонтан абортус.

Според судските документи поднесени во Лос Анџелес, а пренесени од „Пејџ сикс“, жената, чие име сè уште не е објавено, тврди дека работела смени од 11 до 12 часа, пет дена во неделата. Во тужбата се наведува дека уште во декември 2024 година ги информирала своите надредени дека е бремена три месеци и дека ѝ се потребни разумни приспособувања поради здравствената состојба.

Готвачката наведува дека на новогодишната ноќ во 2024 година ѝ било наложено да носи тешки прехранбени производи, без помош. Според тужбата, поради напорот ѝ се слошило, почувствувала вртоглавица и тешкотии со дишењето, по што морало да интервенира обезбедувањето.

Во друг инцидент, таа тврди дека била задолжена да работи на роденденска прослава на едно од децата на Џенер во Палм Спрингс, околу 1 февруари, но дека не добила соодветна поддршка за да ги исполни потребите на настанот. Во тужбата се наведува дека поради исцрпеност и силен физички напор, емотивно се скршила во тоалетот за време на настанот.

Следното утро, според нејзините тврдења, почнала да губи големо количество крв и заминала во болница, каде што ѝ било соопштено дека нема срцева активност кај плодот и дека ја изгубила бременоста.

Поранешната готвачка тврди дека по спонтаниот абортус била дополнително изложена на притисок и обвинувања. Во тужбата се наведува дека била обвинета дека ја оставила кујната и фрижидерот во неред по настанот во Палм Спрингс.

Таа бара неутврдена сума за оштета и тврди дека била изложена на дискриминација поврзана со бременоста, вознемирување, непочитување на потребните приспособувања, неправилна класификација како независен соработник, ненавремена и неточна исплата, како и незаконски отказ.

Претставниците на Кајли Џенер и на поранешната готвачка не одговориле веднаш на барањата за коментар од „Пејџ сикс“.

Ова е трета тужба против Џенер од поранешни вработени во текот на 2026 година. Претходно, две поранешни домашни помошнички поднесоа тужби во кои наведоа дискриминација, понижување и лош третман од други членови на персоналот.

Уште една работничка ја тужи Кајли Џенер за дискриминација и злоставување: „Ја молев за помош“