Од денеска до 23 јануари во швајцарскиот град Давос ќе се одржи 56-от годишен состанок на Светскиот економски форум под слоганот „Духот на дијалогот“, на кој ќе учествуваат светските лидери од политиката, бизнисот, граѓанското општество и академската заедница, со цел преку дијалог да се одговори на клучните глобални предизвици и да се утврдат приоритетите за следниот период
Меѓу 3.000 учесници од 130 земји, кои се очекуваат во алпскиот одморалиште оваа година, ќе има речиси 400 високи политички функционери, вклучувајќи околу 65 шефови на држави и влади,  како и 850 извршни директори и претседатели на водечки глобални компании.

Форумот ќе започне неформално со концерт за учесниците во 18 часот, по што ќе следи состанок наречен „Отворен форум: Каква година сакаме во 2050 година?“

Како што објавија светските медиуми, важен гостин во Давос ќе биде американскиот претседател Доналд Трамп, а ќе учествуваат и германскиот канцелар Фридрих Мерц, претседателката на Европската комисија Урсула фон дер Лајен и многу други политичари.

На настанот ќе присуствуваат генералниот секретар на Обединетите нации Антонио Гутереш, генералниот директор на Светската трговска организација Нгози Оконџо-Ивеала, претседателот на Групацијата на Светска банка Аџај Банга, како и директорката на Меѓународниот монетарен фонд Кристалина Георгиева.

Повеќе од пет децении, Форумот ги собира лидерите од бизнисот, владата, граѓанското општество, меѓународните организации, академијата и следната генерација за да ги разберат глобалните предизвици и заедно да го движат светот напред.

Овогодишната програма се гради врз тоа наследство, обликувано од тековната работа на Форумот и најновите глобални случувања и револуционерни иновации, се наведува во соопштението од Форумот.

Организаторите додаваат дека Давос 2026 претставува неутрална платформа за размена на мислења и барање решенија за заедничките глобални предизвици, од забавување на растот и фрагментацијата на трговијата до безбедноста, климатските промени и забрзаниот развој на вештачката интелигенција.

Програмата е дизајнирана да поттикне идеи, да предложи долгорочни решенија за меѓусебно поврзани предизвици и да отвори нови можности за раст, отпорност и влијание, градејќи ја децениската улога на Форумот како место каде што се среќаваат клучните глобални актери.

Учесниците ќе дискутираат и за нови модели на глобална соработка што би можеле да отворат простор за постабилен и инклузивен раст.

Форумот ќе се осврне и на „човечката димензија“ на економските трансформации, вклучително и инвестициите во вештини, образование и отпорност на работната сила.

Дискусиите ќе го вклучат прашањето за таканаречената „граница на одржливост на планетата“ (планетарни граници), со фокус на енергетската безбедност, заштитата на природата и управувањето со водните ресурси, според веб-страницата на Форумот.