Глобалната поп-ѕвезда Рита Ора ова лето ќе настапи во Охрид, каде што на 1 август ќе одржи голем концерт на стадионот Билјанини извори.

Орa, која важи за една од највлијателните музички и модни икони на современата поп-сцена, зад себе има милијарди стримови, бројни меѓународни признанија и настапи на најголемите светски сцени.

Нејзиното доаѓање во Охрид претставува еден од најзначајните музички настани ова лето во Македонија. Според најавата, концертот ќе понуди целосно продукциско шоу со препознатливиот сценски печат на Рита Ора.

„Глобална музичка и модна икона, артист со милијарди стримови, бројни светски признанија и концерти на најголемите сцени во светот. Ова лето, токму таа го избра Охрид. И таа ноќ ќе носи нејзин потпис“, велат од продукција „Прагма“, кои го организираат овој концерт.

Билетите за концертот во Охрид се продаваат преку мрежата на „Купи карта“, по цена од 1.700 до 2.200 денари.

Организаторите најавуваат голем интерес и препорачуваат навремена набавка на билети за овој ексклузивен летен спектакл во Охрид.