Во периодот од 2009 до 2013 година бев советник на ВМРО-ДПМНЕ во Советот на Општина Центар. Од 2003 до 2018 година бев активна во партијата и два мандати сум била советник. Во тој период сум донирала пари од паушалот кој сум го донирала, а материјално сум помагала во Местниот комитет во населбата Капиштец, изјави Менка Радивојша на денешното рочиште за случајот “Талир-2”.

– Имаше ситуации кога добивме уплатници кои ги пополнивме. Тогаш Игор Есмеров беше претседател на Општинскиот комитет во Центар. Само јас и Даниела Рангелова одбивме да ги потпишеме тие уплатници и за тоа многу сум и благодарна. Искрена да бидам, не видов дали другите членови ги пополниле тие уплатници. Првично не ја сфатив функцијата на тие уплатници, и мислам дека немам потпишувано уплатници со мои податоци – рече Радивојша.

Обвинението за незаконското финансирање на ВМРО-ДПМНЕ го товари Никола Груевски за злоупотреба на службената положба и овластување и за перење пари и други приноси од казниво дело. Груевски е избеган во Унгарија и во сите процеси му се суди во отсуство.

Обвинети се и Кирил Божиновски и Миле Јанакиески, кој е во куќен притвор. Илија Димовски и Леко Ристоски се обвинети за перење пари и други приноси. Обвинета беше и Елизабета Чингаровска, која призна вина. И партијата ВМРО-ДПМНЕ како правно лице е обвинета за перење пари и други приноси. Обвинител во овој случај е Ленче Ристовска, а судечки судија е Осман Шабани.