Документот, рачно напишан од пејачката Арета Френклин, пронајден во нејзиниот кауч по нејзината смрт во 2018 година, е валиден тестамент според законот на сојузната држава Мичиген, заклучи денеска поротата на крајот од судскиот процес што доведе до раздор меѓу синовите на „кралицата на соулот“.

Адвокатите на Кекалф и Едвард Френклин тврдеа дека документот напишан во 2014 година има предност пред тестаментот од 2010 година, кој беше откриен приближно во исто време во заклучен плакар во домот на Арета Френклин во предградието во Детроит, пренесува „Гардијан“.

Кекалф и Едвард се здружија против нивниот брат Тед Вајт II, кој тврдеше дека важечкиот тестамент од 2010 година, чуван под клуч, е поважен од документите пронајдени во каучот. Поротата заклучи дека верзијата од 2014 година ја потпишала самата Арета Френклин, која додала „смајли“ на буквата А.

Има разлики помеѓу верзиите на тестаментот од 2010 и 2014 година, иако двата документи укажуваат дека четирите сина на Арета треба да ги делат приходите од нејзината музика и авторски права. Според тестаментот од 2014 година, Кекалф и неговите деца би го наследиле главниот дом на неговата мајка во Блумфилд Хилс, кој бил проценет на 1,1 милион долари во моментот на нејзината смрт, но денес вреди многу повеќе.

Четвртиот син Кларенс живее во дом за лица со посебни потреби, под старателство и не учествувал во судењето. Адвокатот на неговиот старател изјавил за „Би-Би-Си“ дека тие „постигнале спогодба што му дава на Кларенс процент од имотот без оглед на исходот од спорот за тестаментот“.