По наредба на Гостиварскиот суд, Министерството за внатрешни работи издаде потерница по Ремзи Мифтари, осуден на 10 години затвор за случајот „Дурмо Турс“ или трагичната несреќа во Ласкарци во која загинаа 16 луѓе, а 38 беа повредени.

„Министерството за внатрешни работи презема мерки за негово пронаоѓање и лишување од слобода“, велат од МВР.

Според информациите, излез на Мифтари не бил регистриран на ниту една од граничните премини, поради што потерницата е внатрешна, а не меѓународна.

Мифтари седум месеци го одложуваше издржувањето на казната под изговор на здравствени проблеми, а неодамна и поради операција на „кила на тестиси“. Тој избега откако Гостиварскиот суд издаде наредба на 18 ноември да биде спроведен во затворот „Идризово“.

На газдата на „Дурмо Турс“, Дурмиш Белули, одењето во затвор му е повторно одложено, сега до 1 декември. Пред неколку месеци, тој исто како и Мифтари се пожали на „кила на тестиси“.