Веќе со недели, во Крива Паланка, но и многу пошироко, само расте возбудата пред годинешниот традиционален собир на снаи и свекрви, кој се одржува под покровителство на Општината.

Станува збор за 16-тото издание на манифестацијата „Невестинско поклонение на Свети Теодор Тирон“, кое ќе се одржи на 1 март (недела) во селото Конопница, каде ќе има дефиле на снаи облечени во традиционални носии, придружени од нивните свекрви. Но, таа привилегија и чест, како и секогаш, ќе ја имаат само снаите и свекрвите кои со овие „титули“ во семејната номенклатура се стекнале во изминатата година, поточно свадба правеле во периодот меѓу ланската и годинешната Тодорова сабота.

Манифестацијата, која е дел од нематеријалното културно наследство на регионот, ја организира РЗР „Патник“, а ја поддржуваат локалните културни институции.

„Невестинското поклонение“ годинава ќе има и благо меѓународен карактер, со најавеното учество на гости од Јабланичкиот Округ во Србија. Инаку, најавени се снаи и свекрви од Крива Паланка, Велес, Кочани и Скопје, а се очекуваат гости и од Пијанец.

Организаторите велат дека „посебна атракција“ ќе биде културно-уметничката програма со Андријана Алачки, која ќе ја придружува групата „Синтезис“, предводена од виртуозот на кавал, зурла и гајда, Гоце Димовски.