Кадетската машка ракометно репрезентација на Македонија го освои ЕХФ шампионатот кој се одржа во Рига, Летонија, откако во финалето ја совлада селекцијата на Швајцарија со резултат 24:22.

На патот до финалето во Рига нашите ракометни надежи најпрвин во групната фаза триумфираа против Турција (34:19), Косово (39:16) и домаќинот Летонија (33:23), а во полуфиналето беа подобри од Луксембург (32:22). Со овој успех избраниците на селекторот Раде Стојановиќ обезбедија пласман на кадетското Светско првенство во 2023 година и младинското Европско првенство 2024.

По завршување на финалниот натпревар беше избран идеалниот тим на шампионатот, а во идеалниот тим се најдоа четири репрезентативци на Македонија.

За МВП на шампионатот беше прогласен средниот бек Томислав Димковски. Наградата за најдобро лево крило заврши кај Михаил Тотиќ, а за најдобар голман беше прогласен Давид Брестовац. За најдобро десно крило беше прогласен Александар Петковски.

– Петковски втор најдобар стрелец, голманите Галевски и Брестовац собраа 77 одбрани

Статистички Александар Петковски беше втор најдобар стрелец на турнирот со 38 голови, а блескаа нашите голмани Иван Галевски и Давид Брестовац. Галевски е најдобар голман на шампионато со 28 одбрани (од 55 удари) или 50,9%, а на третата позиција е Брестовац (40,5%) со 49 одбрани од 121 удар. Брестовац е третопласиран кога се во прашање седмерците, одбрани вкупно три пенали од девет удари (33,3%).

– Победите се резултат на работа, посветеност и верба на сите играчи, кои се најзаслужни за овој успех. Верувавме во нив, и сè уште веруваме дека можат уште повеќе и уште подобро. Ракометарите обезбедија настапи на следното кадетско Светско првенство во 2023 година и младинското Европско првенство во 2024, на кои може да играат истите и помлади. Со еден збор направија пат за Европско на играчи родени 2006 година – ни изјави Стојановиќ.

Селекторот на кадетите ги охрабрува сите играчи вредно да тренираат, затоа што преку тренерите ќе бидат вклучени во репрезентативните собири.

– Да, бевме максимални, имавме „пет од пет“, играчите го прифатија системот и начинот на работа кој му го презентиравме и максимално го спроведоа на терен. Беа „гладни“ за победа, за успех, тоа го покажа и гол разликата на сите натпревари до финалето. До самото тоа што се пласиравме, успехот е голем, значи дека овие играчи кариерите ќе им растат и ќе се развиваат на големи натпреварувања, а тоа е голем плус за премин во А репрезентација. Сакам да изразам голема благодарност до сите кои беа со нас овие неполни три месеци и ни даваа поддршка, благодарност до раководството на РФМ, и нашите семејства – рече Стојановиќ.