Вишиот суд во Краљево потврди дека на двајца мажи, кои вчера беа уапсени во Краљево, Србија, под сомнение за подготовка на државен удар, денеска  им е одреден притвор до 30 дена, пишуваат српските медиуми.

Според предлогот на Високото јавно обвинителство во Краљево, со одлука на судијата за претходна постапка на Вишиот суд во Краљево од 24 февруари против осомничените Д.Р. од Краљево и М.Р. од Краљево им е одреден притвор до 30 дена поради постоење основи на сомнение дека сториле кривично дело подготовка на дело против јавниот ред и безбедноста на Србија како соизвршители, соопшти Судот.

Адвокатот на притворените ветерани од 63-та падобранска бригада, Владимир Беочанин, изјави дека неговите клиенти ја презентирале својата одбрана и ги негирале обвинувањата.

„Тие имаа два кратки разговори на 18 февруари, кои траеја по неколку минути. Стануваше збор за коментирање на дневната политика, без никакво споменување на оружје, планови или мобилизација. Апсолутно ништо од она за што се обвинети“, рече Беочанин за локалните медиуми во Краљево.

Тој изјави дека е побаран притвор до 30 дена поради, како што е објаснето, опасноста дека би можеле да го завршат започнатото кривично дело.

„Нема ништо што укажува на подготовка на насилство. Ова е обид да се одвлече вниманието од други општествени прашања“, рече нивниот адвокат.

Во понеделник, полицијата од Краљевац, во соработка со припадници на Безбедносната и информативна агенција, ги уапси Д.Р. (1975) и М.Р. (1983) од Краљево.

Тие се осомничени за организирање насилна промена на уставниот поредок на Србија и соборување на највисоките државни власти, како што е наведено, „со организирање на набавка на оружје и напад врз животот и телото на претседателот на Србија, неговата сопруга и децата, со нивно убивање, како и напад врз припадници на полицијата, со нанесување на телесни повреди“.

ВИДЕО | Двајца воени ветерани се уапсени во Србија, осомничени се дека планирале напад врз Вучиќ и неговото семејство