Српскиот амбасадор во Вашингтон, Драган Шутановац, кој му ги предаде своите акредитиви на американскиот претседател, го покани Доналд Трамп да го посети Белград и нагласи дека двете земји имаат потенцијал да ја зајакнат соработката во енергетиката, вештачката интелигенција, инфраструктурата, одбраната и многу други области.

„Во Белата куќа, му ги предадов моите акредитиви на претседателот Доналд Трамп, официјално преземајќи ја функцијата амбасадор на Србија во САД. Во пријателска и конструктивна атмосфера, разговаравме за односите меѓу Србија и САД. Го потсетив претседателот Трамп дека ниту еден американски претседател не ја посетил Србија од 1980 година – и го поканив да биде првиот што ќе го промени тоа“, рече српскиот амбасадор во објава на социјалните мрежи денес.

Како што додаде, пораката од разговорот е јасна – „Да го направиме српско-американското стратешко партнерство повторно големо“.

Амбасадорот нагласи дека Србија и САД разгледуваат соработка во неколку области од стратешко значење, во областите на енергетиката, вештачката интелигенција, инфраструктурните проекти и одбраната.

Овие сектори претставуваат потенцијал за конкретни инвестиции, размена на знаење и технолошки напредок, но и за дополнителни врски меѓу институциите и компаниите од двете земји.

Според Радио-телевизија Србија, последниот американски претседател што го посети Белград беше демократот Џими Картер во 1980 година.