Спалети со формација 4-3-3 во Скопје, во нападот со Политано, Имобиле и Киеза
В сабота од 18.00 часот на Националната арена „Тодор Проески“ во Скопје ќе се игра натпреварот од квалификациите за ЕП 2024 помеѓу Македонија и Италија.
Италијанските медиуми веќе предвидуваат како би изгледал стартниот состав за кој ќе се одлучи новиот селектор на актуелниот европски шампион, Лучано Спалети.
Можно е Спалети да се одлучи за формација 4-3-3, со Донарума на голманската позиција, во одбраната би биле Ди Лоренцо, Манчини, Бастони и Димарко, во средниот ред Барела, Кристанте и Тонали, а во нападот Политано, Имобиле и Киеза.
Играчот од средниот ред на Рома, Кристанте беше исклучен од „аѕурите“ од јуни 2022 година, но се очекува да биде во стартните 11 против нашата селекција. Барела и Сандро Тонали практично имаат загарантирано место во средниот ред.
Џанлука Манчини, исто така, се враќа по една година и се очекува да игра во централната одбрана со Алесандро Бастони или Алесио Ромањоли, а можно е и Спинацола да стартува пред Димарко.
Во нападот треба да бидат фудбалерот на Лацио, Чиро Имобиле, потоа Матео Политано од шампионот на Серија А, Наполи и ѕвездата на Јувентус, Федерико Киеза. Тоа е промена на позицијата за Киеза, кој оваа сезона беше користен како напаѓач на Јуве, а не на крилните позиции.