Актерката Ким Бејсингер го изненади својот поранешен сопруг Алек Болдвин со ретка јавна честитка, повеќе од две децении по нивниот бурен развод.

Добитничката на Оскар објави сцена од филмот „Оженетиот маж“ (The Marrying Man), на чиј сет во 1990 година започнала нивната љубовна приказна, одбележувајќи 35 години од неговото излегување.

„Морам да напоменам дека денес е и роденденот на Алек Болдвин. Среќен роденден, на мојот филмски партнер. Му посакувам здравје, многу смеа и уште многу убави години со семејството и пријателите“, напиша таа на Инстаграм.

Болдвин, кој има 68 години, ѝ одговори во коментар.

„Ова е исклучително љубезно и целосно неочекувано. Ти благодарам, Вики Вејл“, напиша тој, алудирајќи на нејзиниот лик од филмот „Бетмен“ (Batman).

 

View this post on Instagram

 

A post shared by Kim Basinger (@kim.basinger)

Филмот „Оженетиот маж“ (The Marrying Man), во кој Болдвин глуми милионер кој се вљубува во девојка на гангстер, не постигна голем успех – заработи 12,4 милиони долари, иако буџетот изнесуваше 26 милиони.

Во тоа време, медиумите пишуваа дека двајцата актери создавале тензии на снимањето, што Болдвин подоцна го негираше, нарекувајќи ги обвинувањата „кампања за оцрнување“.

„Тоа беше најголемата грешка во мојата кариера“, изјави тој.

Бејсингер и Болдвин се венчаа во 1993 година, но нивниот однос се влоши кон крајот на деценијата, а разводот беше финализиран во 2002 година, по долг и медиумски експониран судски процес за старателство над нивната ќерка.