Откако тетовскиот градоначалник Биљал Касами вчера соопшти дека има заменик-градоначалник, 27-годишниот Алби Ќамили, денес се огласи тетовскиот огранок на Сојузот на борци од Народноослободителната и антифашистичка војна на Македонија 1941-1945 и граѓаните продолжувачи. Оттаму остро реагираат против етничката мајоризација на Општина Тетово и обвинуваат дека Македонците и другите помали народи се континуирано дискриминирани и оддалечувани од процесот на носење на одлуки.

„Иако до пред извесно време Билал Касами тропаше на сите врати барајќи глас, говорејќи македонски јазик и ветувајќи нов пристап, токму на негов предлог е избран заменик-градоначалник Албанец без дополнително образложение. Прашуваме која квалификација му недостасува да речеме на д-р Бранислав Светозаревиќ (советник од ВМРО-ДПМНЕ, н.з.) да врши должност заменик-градоначалник? Зошто нужните коалиции на централно ниво, не се пресликуваат со принципиелна претставеност и на локално ниво? Исто така, реагираме и на програмата за одбележување на месецот ноември, кога поради денот на албанското знаме и денот на албанската азбука се трошат јавни пари и ресурси, а се заборава на македонскиот јазик, па сите објави во врска со тоа се исклучиво на албански јазик“, велат од Сојузот на борците од НОВ.

„Во текот на месец ноември се одбележува и Денот на ослободувањето на Тетово – 19 Ноември, а тој е игнориран од Општина Тетово, која е за некого мајка, а за некого маќеа. Тука упатуваме критика и до советниците во Советот кои молчат за ваквото елактантно дискриминирање. Доколку почетокот Ви е молчење, како ли ќе биде крајот на мандатот?“, додаваат оттаму.

Касами назначи заменик, има 27 години