Младиот стопер на Барселона, Пау Кубарси, откри интересна анегдота од своите први денови во сениорскиот тим кога Роберт Левандовски не можел да поверува дека има само 17 години.

Неговиот премин од „Ла Масија“ во првиот состав се случи навистина брзо, дебитираше во јануари 2024 година, во меч од Купот на Шпанија, само неколку дена пред да го прослави 17. роденден.

Само три дена подоцна веќе беше стартер во Ла Лига, против Реал Бетис, прикажувајќи издание кое делуваше зрело и сигурно, како да има далеку поголемо искуство зад себе.
Токму тогаш следувал и моментот што денес го раскажува со насмевка.

„Ден по мојот прв натпревар како стартер, Чави пред сите ми го честиташе роденденот. Потоа ми пријде Левандовски и ме праша: ‘Навистина имаш 17 години?’. Не можеше да поверува. Веројатно сè уште имав детско лице“, изјави Кубарси во интервју за „Л’Eкип“.