Документарниот филм „Приказната за Силјан“ во режија на Тамара Котевска бележи исклучителен меѓународен успех со освојување на две значајни номинации на престижните „Синема ај хонорс“ (Cinema Eye Honors), едни од најреномираните глобални признанија за документарна продукција.

Филмот ја освои номинацијата за „Audience Choice Prize“, признание со особена тежина во документарниот свет. Оттаму истакнуваат дека „Audience Choice Prize е често клучен претходник на идните документарни награди, вклучително и на Оскарот за најдобар документарен филм, нагласувајќи дека ова признание е важен индикатор за потенцијалниот успех на филмот во претстојната наградна сезона.

Покрај ова, „Приказната за Силјан“ ја доби и номинацијата Извонредно достигнување во кинематографијата – „Outstanding Achievement in Cinematography“, со која се одликува кинематограферот Жан Дакар за неговиот автентичен визуелен пристап и суптилната, но длабоко филмска естетика што го одбележува филмот. Со ова, „Приказната за Силјан“ го зацврстува својот статус како едно од најзначајните документарни остварувања на годината.

„Национал џиографик“ (National Geographic) официјално ја најави американската премиера на „Приказната за Силјан“, која ќе се одржи на 28 и 29 ноември во „IFC Center“ во Њујорк, со што филмот влегува на големата американска филмска сцена.