Со ѕвон од клучеви Италија се прости од Џулија и крена врева против насилството
Илјадници луѓе во Падова излегоа на улиците за да ѝ изразат почит на Џулија Чекетин, 22-годишната девојка убиена од нејзиното момче, но воедно и да кренат врева против насилството против жените во Италија, кое вообичаено се премолчува во земјата со изразена патријархална традиција.
Џулија била убиена само неколку дена пред да ги заврши студиите по биомедицина. Фотографијата од нејзиното празно столче на денот кога младата девојка требало да дипломира ја потресе целата нација.
Студентката исчезнала на 11 ноември, а нејзиното тело било пронајдено една недела подоцна. За убиството беше обвинет нејзиниот партнер Филипо Турето, кој е приведен во Германија. Тој го признал злосторството и рекол не можел да ѝ прости на Џулија поради тоа што ја раскинала врската. Сега очекува судење во притвор во Италија.
Погребната церемонија во Падова беше директно пренесувана на државната телевизија. Нејзиниот татко Џино ги повика Италијанците погребот на Џулија да биде појдовна точка за запирање на убиствата и на сите видови насилства врз жените. Простувањето заврши со масовно ѕвонење со клучеви, како симболичен повик да не се премолчуваат насилствата.
Убиството на Чекетин поттикна масовни протести низ цела Италија, што ја принуди Џорџа Мелони, првата премиерка во историјата на Италија, јавно да вети дека ќе стори сѐ што може за да ги заштити жените, почнувајќи од кампања во училиштата.