Хрватска пошта започна пилот-проект во Загреб, нудејќи им на станарите можност за дополнителен приход за минимална работа. Жителите на големи згради можат да доставуваат пошта во сопствената зграда за одреден надомест, со што стануваат службеници на Хрватската пошта. Проектот наречен „Достави пошта во зградата и заработи“ привлече голем интерес – се пријавија повеќе од 1.500 луѓе од Загреб. Сега следи процесот на избор на кандидати кои ги исполнуваат условите.

– Станува збор за нов, пофлексибилен начин на вработување со скратено работно време во Хрватската пошта, а проектот е поврзан исклучиво со достава на обична пошта – изјави портпаролот на Хрватската пошта, Никола Бараш.

Оваа работа е првенствено наменета за пензионери или за оние кои веќе се вработени, но имаат доволно време за законски регулирано друго вработување. Избраните кандидати ќе потпишат договор за вработување со скратено работно време и изјава за доверливост и мора да ја преземат одговорноста за пратките.

„Поштарите“ можат да заработат од 100 до 300 евра месечно, а износот зависи од бројот на поштенски сандачиња и фреквенцијата на испорака. Со овој модел, Хрватска пошта планира да им ја олесни работата на постојните поштари.

– При дистрибуција на пакети, заедно со поштенски сандачиња, нашите поштари честопати поминуваат по неколку часа на истото место, не само поради големиот број поштенски сандачиња, туку и затоа што тие често се погрешно етикетирани. Во контекст на денешното работење, каде што имаме сè повеќе пакети, тие неколку часа се скапоцено време – рече Бараш.

Околу 2.000 поштари низ цела Хрватска се ангажирани на терен секој ден. Со приближувањето на шпицот на празниците со зголемен број на онлајн нарачки, Хрватската пошта очекува дека од втората половина на ноември ќе мора да пренасочи поголем број пакети кон автоматите за пратки.