Обожавателите на Дејвид Боуви ќе имаат неверојатна можност да присуствуват на уникатна изложба посветена на животот и делото на легендарниот британски музичар, пишува „Би-би-си“.

Имено, повеќе од 80.000 предмети на Боуви ќе бидат претставени во новоотворениот центар за проучување сценски уметности „Дејвид Боуви“ во Лондон, Велика Британија, откако најголемиот музеј за применета уметност и дизајн во светот – Музејот на Викторија и Алберт ги откупи правата врз скапоцената архива на Боуви.

Изложбата, која ќе биде отворена во 2025 година, ќе им овозможи на неговите обожаватели да се зближат и да добијат нови сознанија за креативниот процес на Боуви.

Боуви е широко признат како иноватор, особено за неговата работа во седумдесеттите години на минатиот век, и познат по неговиот специфичен глас и интелектуалната длабочина во работата. Изложбената колекција ќе вклучува рачно напишани текстови, писма, ноти, оригинални костими, фотографии, филмови, музички спотови, сетови, корици на албуми и награди. Ќе бидат претставени и неговите инструменти, но и некои нереализирани музички проекти, кои досега не биле прикажани во јавноста.

Исто така, посетителите ќе можат да ги видат сценските костими за алтер егото на Боуви, Зиги Стардаст, дизајнирани од Фреди Бурети во 1972 година, креациите на Кансаи Јамамото за турнејата „Aladdin Sane“ во 1973 година и палтото на Јунион Џек, дизајнирано од Боуви и Александар Меквин за насловната страница на албумот „Earthling“ од 1997 година.

Ќе бидат претставени и повеќе од 70.000 фотографии на Дејвид Боуви, направени од најпознатите фотографи од 20. век – од Тери Онил до Брајан Дафи.