Иако Грција е неизбежна дестинација за повеќето граѓани во текот на летото, таа крие и идеални места за посета во есенските и зимските месеци. Двете туристички локации Паралија и Лептокарија, кои се наоѓаат во општина Катерини, кријат бројни природни убавини и настани што можат да се доживеат надвор од летната сезона.

Елина Дијамантопулу, заменик-градоначалничка на Одделот за култура и туризам на Катерини, истакнува дека регионот нуди богато културно и природно наследство.

– Во Катерини имаме македонски гробници, тоа е многу важен споменик тука, античкиот град и планината Олимп – рече Дијамантопулу.

Во подножјето на планината Олимп, длабоко во шумата, се наоѓаат Зевсовите бањи, т.е. скриени водопади, до кои може да се стигне пеш или со автомобил до одреден дел од патот.

Дијамантопулу нагласува дека Катерини не е само летна дестинација.

– Сите знаеме за Катерини поради морето, поради Паралија, но тоа е град и цела општина која е прекрасна во сите годишни времиња. Есента пристигна, кога имаме голем настан, Фестивалот на гастрономијата, во селата на планините Пиреј – истакна заменик-градоначалникот- пренесе Каматица. Фестивалот на гастрономијата Пиреј се одржува во сите поголеми села на планината Олимп, а неговата цел е да промовира локални, домашни производи.

Катерини е позната и по својот традиционален божиќен шарен парк, кој се отвора на 6 декември. Паркот нуди многу концерти, традиционална храна и, секако, Дедо Мраз, а влезот е бесплатен за сите посетители. Општина Катерини, со својот скијачки центар на Олимп, 20 километри крајбрежна линија, 227 хотели и 80.000 гостопримливи мештани, дефинитивно не е само летна дестинација. Градот ги поканува посетителите да го запознаат неговото друго лице оваа есен, во срцето на претпразничната и празничната сезона.