Италијанскиот автор Марио Импорта предизвика бурни полемики во земјата и странство, откако Европската Унија ја прикажа како нацистичкиот логор на смртта Аушвиц, пренесува „Б92“.

Покрај тоа, тој го претстави британскиот премиер Борис Џонсон како затвореник кој бега.

Импорта ја објави оваа илустрација на својот Твитер-профил, откако конзервативците на Џонсон освоија мнозинство на гласови на британските избори, пренесе „АП“.

Цртаниот филм покажува Џонсон како мавта со британско знаме додека бега од концентрацискиот логор со натписот „Европска унија“, на истото место на кое се испишани зборовите „Arbeit macht frei“ (Работата ќе те ослободи) на влезот на озлогласениот нацистички логор.

Brexit cartoon depicts EU as Auschwitz, Boris Johnson as prisoner – https://t.co/LikcsS97o0 #GoogleAlerts

— Alnmouth Beach (@AlnmouthBeach) December 17, 2019

Споредбата на ЕУ со најпознатиот концентрациски логор веднаш предизвика бран на критики од страна на политичарите, еврејската заедница во Рим, па дури и од некои уметници на Твитер.

На Твитер-профилот на Меморијалот Аушвиц на италијански јазин е објавена пораката дека паролата „Arbeit macht frei“ е цинична илузија која нацистите им ја давале на затворениците во логорот, и дека тие зборови станале еден од симболите за човечката омраза.

– Сеќавањето на Аушвиц и неговите жртви е болно кога овој симбол се користи и срамно се злоупотребува – стои во коментарот на Твитер на Меморијалот Аушвиц.

По силните критики, Импорта во понеделникот го измени цртежот, заменувајќи го нацистичкиот логор со тоалет, со признанието дека не било коректно да се поистоветува ЕУ со концентрациски логор.