Истражување во Шведска покажа дека до крајот на април, само 7,3 проценти од жителите на Стокхолм развиле антитела на коронавирусот, што може да ги зголеми стравувањата, дека Шведска, која не воведе карантин, нема да постигне колективен имунитет така брзо како што се надеваше.

Оваа стратегија ја заговараше главниот шведски епидемиолог Андерс Тегнел, кој препорача да се користат доброволни мерки против ширење на вирусот, за разлика од другите земји кои воведоа задолжителни мерки и карантин. На средината на април група експерти испратија писмо како реакција на ваквата одлука, со апел „радикално да се промени шведскиот пристап“.

Во Шведска, повеќето училишта, ресторани, кафулиња и деловни објекти останаа отворени, дури и додека поголемиот дел од Европа беше затворена. Бројот на смртни случаи од Ковид-19 е многу поголем отколку во другите нордиски земји, иако е помал отколку во земји како Велика Британија, Италија и Франција.

Бројот на пациенти на интензивна нега во Шведска се намали за една третина, откако го достигна својот врв на крајот на април, а здравствените власти тврдат дека епидемијата забавува. Сепак, во последните седум дена Шведска забележа најголем број смртни случаи по глава на жител во Европа.

Со истражувањето за антитела, тие сакаа да утврдат дали постои потенцијал за колективен имунитет, односно дали доволен број од популацијата развиле имунитет, што би спречило да се шири инфекцијата.

Шведската здравствена агенција вчера соопшти дека резултатите од тоа истражување се совпаѓаат со нивните модели дека е заразен речиси третина од Стокхолм, објаснувајќи дека студијата е спроведена пред многу време, така што болеста во меѓувреме се проширила.

– Тоа е нешто помалку отколку што очекувавме, но не многу, можеби за еден до два процентни поени, рече Тегнел.

Концептот на колективен имунитет сè уште не е тестиран во однос на коронавирусот и не се знае колку трае имунитетот од инфекција кај оздравените пациенти.

Истражувањето е направено врз основа на 1,1 илјади тестови од цела Шведска, а објавени се само бројките за главниот град.

Шведскиот пристап кон епидемијата на новиот коронавирус е предмет на критика како и од некои граѓани на Шведска, така и од здравствени експерти од други земји .

Во Шведска во април оваа година забележан е најголем број на смртни случаи од 1993 година. Според статистичките податоци на Шведска, од вкупно 10.3 милиони жители, регистрирани се 10.458 смртни случаи во април. Во декември 1993 година, Шведска евидентирала вкупно 97.008 смртни случаи, најголем број од 1918 година, кога пандемијата на шпанскиот грип одзеде голем број животи во земјата.

– Никогаш не сум напишал олку многу посмртници, никогаш не сум работел олку многу часови, вели Иса Јакуб, доктор кој работи во една од најголемите државни болници во Стокхолм, надоврзувајќи се на експертите кои во април предупредија дека Шведска ќе се соочи со „историски масакр“.

ЗАГРИЖУВАЧКИ ПОДАТОЦИ: Шведска со највисока стапка на смртност од 1993 година